BIAFF-ის პროგრამა ასევე უთმობს სივრცეს კინორეჟისორებს, რომელთა შემოქმედებამ თანამედროვე კინოს განვითარებას მნიშვნელოვანი კვალი დაამჩნია. „დიდოსტატთა კოლექცია“ აერთიანებს საერთაშორისო მასშტაბით აღიარებული რეჟისორების ნამუშევრებს, მათ შორის რიუსუკე ჰამაგუჩის, აგნიეშკა ჰოლანდის, პაველ პავლიკოვსკის, ასგარ ფარჰადის, პაოლო სორენტინოს, კრისტიან მუნგიუს, ფოლკერ შლენდორფისა და ულრიკე ოტინგერის ფილმებს.

მათი მონაწილეობა BIAFF-ის ერთ-ერთ მუდმივ მისწრაფებას ასახავს, ახალი აღმოჩენები იმ რეჟისორების შემოქმედებასთან ერთად წარმოადგინოს, რომელთა ნამუშევრებიც უკვე თანამედროვე კინოს ისტორიის ნაწილია.

აღდგენილი ქართული ფილმები BIAFF-ის პროგრამის მნიშვნელოვან ნაწილს წარმოადგენს. მათი საშუალებით ფესტივალი ქვეყნის კინემატოგრაფიულ მემკვიდრეობას ახალ მაყურებელს აცნობს და ქართული კინოს ისტორიასა და დღევანდელ დამოუკიდებელ კინოს შორის კავშირს ქმნის.

ფესტივალი ამ მემკვიდრეობის ახალგაზრდა მაყურებლისთვის გაცნობასაც განსაკუთრებულ ყურადღებას უთმობს. სპეციალური საბავშვო პროგრამა მათ ქართულ აღდგენილ ანიმაციას აცნობს და საშუალებას აძლევს, აღმოაჩინონ ქართული კინოს გამორჩეული ნამუშევრები.

ინდუსტრიული პლატფორმის, ალტერნატიული ტალღის, ფარგლებში ფესტივალი მხარს უჭერს შერჩეულ ქართულ და საერთაშორისო პროექტებს განვითარებას ვორქშოფებით, საერთაშორისო მენტორინგით, საპიჩინგო სესიებით, პროფესიული შეხვედრებითა და ჯილდოებით. პროგრამა ახალგაზრდა კინემატოგრაფისტებს ეხმარება პროექტების განვითარებაში, პროფესიული კავშირების გაძლიერებასა და საერთაშორისო თანამშრომლობისა და კოპროდუქციის ახალი შესაძლებლობების შექმნაში.